လိုအပ်နေတာ ဒီလို လူမျိုးတွေပါ Food for Thought 661

ဒီနေ့ မျက်မှောက်ကမ္ဘာမှာ လိုအပ်နေသူတွေအကြောင်းကို Food for Thought 661 အဖြစ်မျှဝေလိုက်ပါတယ်။
ဒေါက်တာသိန်းလွင်
ပါမောက္ခ၊ (ငြိမ်း) ပညာရေးစိတ်ပညာဌာနာ၊ ရန်ကုန်ပညာရးတက္ကသိုလ်။


လိုအပ်နေတာ ဒီလို လူမျိုးတွေပါ

“ကျွန်ုပ်တို့ လူသားတွေအနေနဲ့ မှီတင်းနေထိုင်နေတဲ့ကမ္ဘာကြီးဟာ ကျွန်ပ်တို့အတွက်အိမ်ပင်ဖြစ်ပါတယ်။ လူသား တွေကမှီတင်းနေထိုင်နေတဲ့ကမ္ဘာကြီးကိုကျေးဇူးဆပ်တဲ့အနေနဲ့ အဆုံးစွန် အကောင်းဆုံးပြန်ပေးနိုင်တဲ့ လက် ဆောင်ကတော့ ကလေးတွေကို စိတ်ကောင်းရှိပြီး နှလုံးလှတဲ့လူကြီးများဖြစ်အောင်လေ့ကျင့်ပေးရန်ဖြစ်ပါတယ်။

• အဲဒီလူတွေဟာ ကိုယ်ပိုင်စဥ်းနိုင်စွမ်းရှိသူများဖြစ်ရန် လိုအပ်ပါတယ်။
• အခြားလူတွေအပေါ်ထောက်ထားစာနာတတ်ပြီးအ‌ခြားလူတွေနေရာမှဝင်ကြည့်မြင်နိုင်စွမ်းသူများဖြစ် ရန် လိုအပ်ပါတယ်။
• ဆင်ချင်အားကောင်းပြီးအရေးပါတဲ့မေးခွန်းတွေ မေးတတ်သူများဖြစ်ရန်လိုအပ်ပါတယ်။
• ခြေခြေမြစ်မြစ် ဆန်းသစ်ဖန်တီးလိုသူ၊ လောကကမှာ မကောင်းတာတွေ ကို တော်လှန်လိုသူများဖြစ်ရန် လိုအပ်ပါတယ်။
• ကမ္ဘာမှာငြိမ်းချမ်းမှုရအောင်စိတ်အားထက်သန်စွာပူးပေါင်းလျက် ကြိုးစားလုပ်ဆောင်လိုသူများဖြစ်ရန် လိုအပ်ပါတယ်။

“မျက်မှောက်ကမ္ဘာမှာ အားကြီးတဲ့အာဏာရှင်တွေကို မျက်စိစုံမှိတ်ပြီး အာဏာရှင်တွေအမိန့်ပေးသမျှ ဟုတ်ကဲ့ ခင်ဗျာ့ဆိုပြီး ခေါင်းငြိမ့်ပြခါ အာဏာရှင်အကြိုက်လိုက်လုပ်နေသူ များမလိုအပ်ပါ။ ကမ္ဘာကြီးလိုအပ်နေတဲ့လူကြီး တွေဆိုတာကတော့ အင်အားကြီးတဲ့အုပ်ချုပ်နေသူတွေကို သူတို့လုပ်ရပ်အတွက် တာဝန်အပြည့်အဝယူလာ အောင် မေးခွန်းတွေမေးပြီးစိန်ခေါ်တဲ့ အ‌ခြေ အနေတွေ ဖန်တီးပေးနိုင်တဲ့လူကြီးတွေဖြစ်ပါတယ်။” (L.R. Knost)
လိုအပ်တဲ့လူများ

မျက်မှောက်ကမ္ဘာမှာ လိုအပ်နေသူတွေက အခြားလူတွေအပေါ်ထောက်ထားစာနာမှုရှိသူများ၊ အားလုံး ကောင်း စားရေးကို ဦးစားပေးလုပ်ဆောင်သူများလိုအပ်နေပါတယ်။ အားလုံးအတွက် ပိုကောင်းတဲ့ကမ္ဘာကြီးဖြစ်လာ အောင်ဖန်တီးနိုင်သူများ လိုအပ်ပါတယ်။

လိုအပ်တဲ့စိတ်နေစိတ်ထား (မေတ္တာတရား)

တစ်ချို့ကစဥ်းစားနိုင်ပါတယ်။ လောကမှာ လိုအပ်နေတာက ‌ငွေ၊ အစားအစာနှင့် ငြိမ်းချမ်းရေးလို့ စဥ်းစားသူ များရှိနိုင်ပါတယ်။ တကယ်တော့ကမ္ဘာလောကမှာလိုအပ်နေတာက မေတ္တာတရားဖြစ် ပါတယ်။ မေတ္တာတရားမှာ လူသားတိုင်းလိုအပ်ပါတယ်။ မေတ္တာတရားဆိုတာ သက်ရှိတိုင်းအ တွက် လိုအပ်တဲ့ဘာသာစကားဖြစ်ပြီး လူသား အားလုံးကို စုစည်းညီညွတ်စေလျက်ညီညီညွတ်ညွတ်မျှမျှတတ အတူလက်တွဲနေနိုင်ဖို့အတွက်အခြေခံကျတဲ့ လိုအပ်ချက်ဖြစ်ပါတယ်။ မျက်မှောက်ကမ္ဘာမှာ လူအများက အေးစက်တဲ့ စိတ်ထားရှိနေပြီး အလေးထား ဆက်ဆံမှု‌တွေများစွာ ကင်းနေပါတယ်။ ကမ္ဘာနေရာအတော်များများမှာ စစ်တွေဖြစ်နေပြီး လူတွေမှာ ဘေး အမျိုးမျိုးကြုံနေရကြ ရပါတယ်။ အဲဒီလိုအနေအထားမှာ မေတ္တာပြနိုင်တဲ့အဖော်ရှိမယ်ဆိုရင် ကြုံတွေ့လာတဲ့ အခက်အခဲတွေကိုရင်ဆိုင် ကျော်လွှား နိုင်မှာဖြစ်ပါတယ်။ မေတ္တာတရားကလူတွေကြုံနေရတဲ့အခက်အခဲဒုက္ခ အမျိုးမျိုးတွေကို ရင်ဆိုင် ကျော် လွှာနိုင်စေရန် အားဖြစ်စေပါတယ်။

ထောက်ထားစာနာတတ်မှု

ထောက်ထားစာနာတတ်မှုဆိုတာကလည်းအခြားလူတွေခံစားနေရတာကို နားလည်နိုင်ပြီး အခြားလူတွေနှင့် တူညီ တဲ့ခံစားနားလည်ပေးနိုင်မှုဖြစ်ပါတယ်။ မျက်မှောက်ကမ္ဘာမှာ အဲဒီထောက်ထားစာနာတတ်မှုကအလွန်အား နည်း နေပါတယ်။ ထောက်ထားစာနာတတ်မှုဆိုတာ အားနည်းနေသူများ၊ နွမ်းပါးနေသူများအတွက်သာမဟုတ်ပါ။ ထောက်ထားစာနာမှုဆိုတာ လူသားတိုင်းအတွင် မရှိမဖြစ် လိုအပ်တဲ့အစိတ်အပိုင်းဖြစ်ပါတယ်။

လူတွေအပေါ်ထောက်ထားစာနာမှုပြတဲ့အခါ လူတွေကို ကြင်နာစွာမေတ္တာထားပါတယ်။ အဲဒီလို မေတ္တာထား တာက ဘာမှပြန်ပြီးမျှော်လင့်နေခြင်းမရှိပါဘူး။ လူသားအချင်းချင်း ကြင်နာစွာဆက်ဆံခံဖို့ လိုအပ်တယ်ဆို တဲ့စိတ်ဖြင့် ကြင်ကြင်နာနာမေတ္တာထားဆက်ဆံခြင်းဖြစ်ပါတယ်။ လူတွေအပေါ်မှာ သူတို့ကြွယ်ဝချမ်းသာမှု၊ ဆင်းရဲမှု၊ မတူတဲ့အသားအရောင်၊ ကွဲပြားတဲ့ယဥ်ကျေးမှုတွေ၊ လိင်ကွဲပြားမှုတို့ ကြောင့် ခွဲခြားဆက်ဆံ တာမျိုးတွေမပြုလုပ်သင့်ပါ။ လူတိုင်း လူသားဖြစ်တဲ့အတွက် လေးစားတန်ဖိုးထားဆက်ဆံသင့်ပါတယ်။

ကောင်းတဲ့လုပ်ရပ်များ

ကောင်းတဲ့လုပ်ရပ်များကို အလေးထားလုပ်ဆောင်တဲ့လူကြီးများလိုအပ်ပါတယ်။ ကောင်းတဲ့လုပ်ရပ်ဆိုတာ အသက်အရွယ်မရွေး သိပ်အခက်အခဲမရှိဘဲ လုပ်ဆောင်နိုင်ပါတယ်။ ကောင်းတဲ့လုပ်ရပ်များတွင် အောက်ပါတို့ ပါဝင်ပါတယ်။
• လူတိုင်းအပေါ် ကြင်နာစွာပြောဆိုဆက်ဆံမှု၊
• ရပ်ရွာလူထုကောင်းကျိုးအတွက်စေတနာဝန်ထမ်းဆောင်ရွက်ပေးမှုများ၊
• မိသားစုဝင်များ၊ သူငယ်ချင်းမိတ်ဆွေများ၊ မတွေ့ရတာကြာပြီဖြစ်သူအတန်းသားများထံ ဆက်သွယ်မှု၊
• မိသာစု၊ ချစ်ခင်သူနှင့်အတူတူ ပျော်ရွှင်စွာနေထိုင်မှု၊

စေတနာကောင်းဖြင့်ရက်ရောမှု

စေတနာကောင်းထားတဲ့ရက်ရောမှုဟာ မျက်မှောက်ကမ္ဘာမှာအလိုအပ်ဆုံးသော လိုအပ်မှုဖြစ်နေပါတယ်။ စေတ နာကောင်းထားတဲ့ရက်ရောမှုဆိုတာ စိတ်ထားရင့်ကျက်မှု၊ အသိဉာဏ်ရှိမှုနှင့် မိမိကိုယ်မိမိနှိမ်ချပြီး လူတွေကို လေးစားစွာဆက်ဆံတတ်မှုဖြစ်ပါတယ်။ လူတိုင်းဟာ စေတနာကောင်းထားတဲ့ရက်ရောမှုကို နည်းလမ်းအမျိုး မျိုးဖြင့် လုပ်ဆောင်နိုင်ပါတယ်။ လိုအပ်နေသူများအတွက်မိမိမှာရှိတဲ့ငွေကြေး၊ အချိန်၊ လုပ်အား၊ ဝန်ဆောင် ကူညီပေးမှု၊ နှင့် အခြားရင်းမြစ်များကိုပေးနိုင်ပါတယ်။

ကြင်နာမှု

ကြင်နာမှုမှာ အခြားလူတွေအပေါ်မှာ ထောက်ထားစာနာပြီး လေးစားစွာပြုမူဆက်ဆံလုပ်ဆောင်ပေးမှုပင်ဖြစ် ပါတယ်။ မိမိအပေါ်မှာကြင်နာစွာပြုမူလုပ်ဆောင်ခြင်း၊ အခြားလူများအပေါ်မှာကြင်နာစွာပြောဆိုလုပ်ဆောင် ပေးခြင်း၊ တိရစ္ဆာန်လေးများအပေါ်ကြင်နာစွာပြုမူပေးခြင်းစသဖြင့် အမျိုးမျိုး လုပ်ဆောင်ပေးနိုင်ပါတယ်။ ကြင်နာမှုပြတာက အခြားလူတွေအပေါ် စာနာထောက်ထားပြီးသူတို့ခံစားနေရမှုများကိုနားလည်ကြောင်း ပြသ ခြင်းပင်ဖြစ်ပါတယ်။ ကြင်နာမှုပြခြင်းဖြင့် ကြင်နာမှုအပြခံရသူတွေအနေဖြင့်လည်း မိမိတို့ခံစားရသလို အခြားလူတွေအပေါ်မှာကြင်နာစွာဆက်ဆံလာအောင်အကူအညီပေးရာလည်းရောက်ပါတယ်။

လူတိုင်းဟာချစ်ခင်လေးစားမှုခံထိုက်ပါတယ်။ ထို့ကြောင့် လူတွေကို ဆက်ဆံတဲ့အခါမှာကြင်နာစွာဆက်ဆံတဲ့ အပြင် သူတို့ကို လူမျိုး၊ ဘာသာ၊ ယဥ်ကျေမှု၊ လိင်၊ အသားအရောင် ဘယ်လိုပင်ရှိစေကာမူ လုံးဝခွဲခြား ဆက်ဆံခြင်းမရှိဘဲ တန်းတူဆက်ဆံရန် လိုအပ်ပါတယ်။

ဒီကမ္ဘာကြီးဆိုတာသက်ရှိတွေအတူတူမှိတင်းနေထိုင်တဲ့အိမ်ကြီးဖြစ်ပါတယ်။ ဒါကြောင့် ကမ္ဘာလောကကြီးကို ကောင်းစွာပြန်လည်စောင့်ရှောက်ရန်လည်းအရေးကြီးပါတယ်။ အခြားလူတွေအတွက်ကောင်းတာတွေကို လုပ် ဆောင်ပေးနိုင်တဲ့အခါ မိမိတို့စိတ်ထဲမှာ ကျေနပ်နှစ်သက်မှုဖြစ်လာကြပါတယ်။ အခြားလူတွေကမိမိတို့ ကောင်းဖို့လုပ်ဆောင်ပေးခံရတဲ့အခါမှာလည်း မိမိတို့မှာဝမ်းမြောက်ဝမ်းသာခံစားရပါတယ်။ ဒါကြောင့် ကမ္ဘာ ပေါ်မှာအတူတူနေထိုင်ကြသူများဖြစ်တဲ့အားလျော်စွာလူသားအားလုံးစိတ်မှာပျော်ရွှင်ချမ်းသာစွာသက်ရှင် နေထိုင် ခွင့် ရအောင်အားလုံးအတူတူ လက်တွဲဆောင်ရွက်သင့်ပါတယ်။

မိတ်ဆွေများ အေးချမ်းသာယာတ့ကမ္ဘာကြီးဖြစ်အောင် အားထုတ်ရာမှာ တက်ကြွစွာပါဝင်နိုင်ကြပါစေ။
မေတ္တာဖြင့်
ဒေါက်တာသိန်းလွင်
ပါမောက္ခ၊ (ငြိမ်း) ပညာရေးစိတ်ပညာဌာနာ၊ ရန်ကုန်ပညာရးတက္ကသိုလ်။