စာများများဖတ်ဖို့အရေးကြီးကြောင်းကို Food for Thought 664

ဒီနေ့စာများများဖတ်ဖို့အရေးကြီးကြောင်းကို Food for Thought 664 အဖြစ်မျှဝေလိုက်ပါတယ်။
ဒေါက်တာသိန်းလွင်
ပါမောက္ခ၊ (ငြိမ်း) ပညာရေးစိတ်ပညာဌာနာ၊ ရန်ကုန်ပညာရးတက္ကသိုလ်။


စာများများဖတ်ပါ။

ပြတင်းပေါက်ကိုဖွင့်ထားပါ။

စာမတတ်သူက ပြတင်းပေါက်မပါတဲ့ အိမ်နဲ့တူတယ်တဲ့ ။ အလင်းမဝင် လေကောင်းမရ။ စာတတ်ပြီး စာမဖတ်သူက ပြတင်းပေါက်ပါပြီး ပြတင်းပေါက်မဖွင့်ဘဲ ပိတ်ထားတဲ့အိမ်နဲ့ တူတယ်တဲ့ ။ အလင်းမဝင် လေကောင်း မရတာ အတူတူပါဘဲ။ စာလည်းတတ် စာလည်းဖတ်သူကတော့ ပြတင်းပေါက်ရှိပြီး ပြတင်း ပေါက်ကို ဖွင့်ထားတဲ့အိမ်မှာ အလင်းရောင်နဲ့ လေကောင်းရသလို အသိအမြင် ညာဏ်ပညာ အလင်းရတယ်။ စာနည်းနည်းဖတ်ရင် အသိအမြင် နည်းနည်းကျယ်တယ်။စာများများဖတ်ရင်အသိအမြင်အများကြီးကျယ် တယ်။

အခွင့်သာတိုင်း စာဖတ်ပါ။

တိုးတက်တဲ့သူတွေက အချိန်ကိုအကျိုးမဲ့ အကုန်မခံဘူး။ရထားစောင့်ရင်း ကားစောင့်ရင်း စာဖတ်တယ်။ သင်္ဘောစီးရင်း စာဖတ်တယ်။ အစည်းအဝေးမစသေးရင် စာဖတ်တယ် ။သွားလေရာလက်ဆွဲအိပ်ထဲမှာ စာအုပ်ပါတယ်။ သွားရင်း လာရင်း နေရင်း ထိုင်ရင်း အခွင့်သာတာနဲ့စာဖတ်ပါ။ အသိပညာတွေတိုးစေ ပါတယ်။ တော်သူတွေက ပိုတော်အောင်၊ ထက်သူတွေက ပိုထက်အောင်ကြိုးစားနေကြပါတယ်။

စာဖတ်ခြင်းဖြင့်မြှင့်တင်ပါ။

ကမ္ဘာပေါ်မှာ ဘယ်နိုင်ငံ ဘယ်နေရာဖြစ်ဖြစ် ရွာသိမ် ရွာငယ်လေးရဲ့ အစွန် အဖျား တဲအိမ်လေးမှာ ဖြစ်ပါစေ စာအများကြီးဖတ်ရင် နောက်ကျမကျန်ခဲ့ပါဘူး ။ကမ္ဘာနဲ့အညီ ခေါတ်မှီတိုးတက်နေပါလိမ့်မယ် ။ စာဖတ်ခြင်း ဖြင့် မိမိကိုယ်ကို မြှင့်တင်ပါ။ စာဖတ်ဝါသနာကြီးပြီးစာအများကြီးဖတ်တဲ့ ( အေဘရာဟင်လင်ကွန်း ) ဟာ သစ်တောထဲရှိ သစ်လုံးအိမ်မှာ နေတဲ့သစ်ခုတ်သမားဘဝကနေ အမေရိကန်နိုင်ငံရဲ. သမ္မတကြီးအဖြစ်နဲ့ အိမ်ဖြူတော်ကိုရောက်ခဲ့တယ် ။

မြန်မာနိုင်ငံမှာလည်း ဝန်ဇင်းရွာသား ( စာတိုငညို )လို့ခေါ်ရလောက်အောင်စာဖတ်ဝါသနာကြီးတဲ့ လယ်သ မား မောင်ညိုဟာ စာအများကြီးဖတ်ခြင်းကြောင့် ထွန်းတုံးပေါ်ကနေ နန်းတော်ပေါ်ရောက်ပြီး ပညာရှိ အ မတ်ကြီး ဝန်ဇင်းမင်းရာဇာအမည်နဲ့ မင်းသုံးဆက်တိုင် ချီးမြှောက်ခံရတယ်။

စာဖတ်ခြင်းနှင့်အသိအလိမ္မာ ညဏ်ပညာ

စာများများဖတ်သူတိုင်းဟာ အသိပညာ ဗဟုသုတ ကြွယ်ဝလာပါတယ် ။ စဥ်းစားဆင်ခြင်တုံတရား အား ကောင်းလာတယ် ။ အမှန်အမှား ဝေဖန်ပိုင်းခြားနိုင်စွမ်း ကြီးမားလာတယ် ။ အမှားကိုရှောင် အမှန်ကိုဆောင် နိုင်ပြီး လူလိမ္မာဖြစ်လာတယ် ။ လောကမှာ ဘယ်သူကမှအခြားတစ် ယောက်ယောက်ကို ထာဝရ မစောင့် ရှောက်နိုင်ဘူး ။ ကိုယ်တိုင် အသိအလိမ္မာနဲ့ ကိုယ့်ဘာသာစောင့်ရှောက် မှ ဘဝလုံခြုံမှာပါ။ စာဖတ်ခြင်းဟာ အသိအလိမ္မာ ညဏ်ပညာ ကြီးမြင့်တာနဲ့အမျှ ဘဝအောင်မြင်တိုးတက် ရေး အတွက် ကြိုးပန်းမှု့ကိုလည်း ကြီးစွာအထောက်အကူပြုပါတယ်။ ကြီးပွားအောင်မြင်ပြီးရင်လဲ မပြိုမလဲ အောင် ထိန်းသိမ်းနိုင်စွမ်းရှိစေပါ တယ် ။မတော်တဆ မမျှော်လင့်တဲ့အကြောင်း တခုခုကြောင့် ပြိုလဲကျရင်တောင် ပြန်ထနိုင်တဲ့ စွမ်းရည်ရှိပါ တယ်။

စာကောင်းများရွေးပြီး စာများများ ဖတ်ပါ။

စာဖတ်တာကိုအကျင့်ပါနေအောင်လုပ်ပါ ။ အခွင့်သာတိုင်း စာဖတ်ပါ ။ စာအများကြီးဖတ်ပြီး ညာဏ်ပညာ ကြီးမြင့်ပါစေ။ လူတော်လူကောင်းဖြစ်ပြီးဘဝအောင်မြင်ပါစေ။ စာဖတ်ဖို့တိုက်တွန်းတာက စာကောင်းစာ ပေကိုရွေးဖတ်ဖို့ကလည်း အရေးကြီးပါတယ်။ အခုခောက်မှာ အင်တာနက်မှာဖတ်စရာစာတွေအလွန်များ ပါတယ်။ မိမိဝါသနာပါတာကိုရွေးပြီးစာဖတ်နိုင်တဲ့အခွင့်ရှိလာပါတယ်။ ဒါကြောင့် ပွင့်လာတဲ့အခွင့်အရေးကို အကောင်းဆုံးအသုံးချပြီး လူတော်လူကောင်းတွေဖြစ်အောင် စာကော်းစာမွန်တွေကိုရွေးချယ်ဖတ်ဖို့ လိုအပ် ပါတယ်။

မိတ်ဆွေများစာများများဖတ်ပြီးပိုကောင်းပိုတော်သူများဖြစ်နိုင်ကြပါစေ။
မေတ္တာဖြင့်

ဒေါက်တာသိန်းလွင်
ပါမောက္ခ၊ (ငြိမ်း) ပညာရေးစိတ်ပညာဌာနာ၊ ရန်ကုန်ပညာရးတက္ကသိုလ်။